A novena edición dos Encontros de Embarcacións Tradicionais de Galicia, que este ano se celebrará na vila de Muros entre os días 9 e 12 de xullo, iniciou xa a súa andaina. Para o sábado fixouse a presentación do programa de actos a desenvolver e onte comezaron unhas xornadas formativas para hostaleiros, promovidas pola comisión encargada de organizar o acontecemento.
Os promotores do encontro decidiron que a oferta gastronómica para os visitantes correse a cargo de de os propios hostaleiros do municipio muradán. Por este motivo, encargouse á empresa Adapta Consultores que impartise un curso co fin de facilitar aos xerentes dos locais de hostalería coñecementos e habilidades para optimizar o emprego culinario dos produtos mariñeiros.
Así, unha vintena de profesionais de Muros acoden, durante as tardes desta semana, a unhas xornadas gastronómicas, que se desenvolven no cámping A Vouga. Neste curso impártense nocións sobre o emprego de novas técnicas de preparación e presentación de receitas de tapas e menús, que teñen como ingredientes principais algunha das variedades dos produtos marítimos.
Técnicas
á vez, preséntanse técnicas de comunicación e comercialización co fin de ofrecer un servizo de calidade nun ambiente confortable. Ao mesmo tempo, perséguese a posta en valor dos menús a ofertar a veciños e visitantes.
Para iso, preténdese conseguir unha ambientación adecuada dos establecementos, deseñar menús de degustación e outras opcións que favorezan unha acollida e estancia favorable aos comensais. Os encontros servirán tamén de promoción da localidade muradá entre os asistentes. |
